Á völdum stöðum var safnað sýnum til mælinga á geislavirkum efnum og ólífrænum kolefnissamböndum. Auk þess voru gerðar mælingar með síritandi mælitækjum á siglingaleið skipsins. Þá var sinnt rannsóknum á svifi suðvestur af landinu en það verkefni tengist alþjóðlegum rannsóknum á umhverfisþáttum (EURO-BASIN) á Norður Atlantshafi.
Helstu niðurstöður vorleiðangurs voru eftirfarandi:
1. Ástand sjávar
Sjávarhiti í hlýsjónum suður og vestur af landinu var 5° - 8.5°C og seltan 35,1 - 35,3, sem eru há gildi líkt og undanfarin ár. Þó var hiti vestanlands nokkuð lægri nú en á síðustu árum. Innflæði hlýsjávar inn á Norðurmið var töluvert og náði hlýsjór austur fyrir Tröllaskaga. Hiti og selta í efri lögum sjávar úti fyrir Norðurlandi var yfir meðallagi. Á landgrunni úti fyrir Norð-Austurlandi var hiti yfir meðallagi. Hiti og selta í Austur-Íslandsstraumi yfir landgrunnshlíðum norðaustur af landinu var yfir meðallagi. Úti fyrir Austfjörðum var sjávarhiti og selta í efri lögum sjávar um meðallag (2° - 3°C, 34,6 – 34,75). (2.mynd) .
2. Næringarefni og plöntusvif
Almennt var styrkur næringarefna í yfirborðslögum enn hár og lítið hafði gengið á vetrarforða þeirra. Þetta bendir til að vorblómi svifþörunga sé frekar seint á ferðinni í ár. Styrkurinn var víðast jafn frá yfirborði og allt niður á 50 metra dýpi. Í upphafi leiðangurs voru næringarefni enn í háum styrk á Faxaflóa þó að einhver vöxtur þörunga hafi verið til staðar næst landi. Vestur af landinu og undan Norðvesturlandi var styrkur næringarefna óbreyttur frá því sem búast má við að vetrarlagi. Hár styrkur næringarefna benti til að vorkoma gróðurs hafði ekki átt sér stað þar. Undan Norðausturlandi, Austurlandi og Suðurlandi hafði styrkur næringarefna lækkað frá vetrarhámarki en þar var þó en gnótt næringarefna sem getur staðið undir miklum vexti svifþörunga til viðbótar. Vorkoma gróðurs var víðast hvar skammt á veg komin, þó vorblómi hafi að venju verið hafinn í Faxaflóa. Mest áberandi var gróðurmagnið djúpt norðaustur af landinu frá Siglunessniði að Krossanessniði og svo á grunnslóð sunnan landsins. Vöxtur gróðurs virðist í heildina hafa tekið seint við sér þetta vorið.
3. Áta
Þegar á heildina er litið var átumagn við landið í vorleiðangri nálægt meðallagi. Út af Vesturlandi var átumagnið talsvert undir meðallagi en rétt undir meðallagi á Norður- og Austurmiðum, en á þeim slóðum reyndist átan að venju mest í kalda sjónum djúpt norðaustur af landinu, þar sem stórar og hægvaxta kaldsjávartegundir voru algengastar. Átumagn var yfir meðallagi fyrir Suðurlandi, en þar var rauðáta áberandi í flestum sýnum en einnig var töluvert af ljósátu ungviði. Séu niðurstöður um átu bornar saman við vorið 2010 kemur í ljós að átumagnið var svipað, en þó reyndist minna magn á Norðurmiðum en meira magn á Austurmiðum.
4. Samantekt
Í vorleiðangri 2011 voru hiti og selta um og yfir langtímameðaltali umhverfis landið. Hiti við vestanvert landið var heldur lægri en verið hefur síðustu árin á þessum árstíma. Almennt var styrkur næringarefna í yfirborðslögum enn hár og lítið hafði gengið á vetrarforða þeirra sem bendir til að vorblómi svifþörunga sé ekki búinn. Átumagn var nálægt langtímameðaltali.
Leiðangursstjóri í vorleiðangri var Héðinn Valdimarsson, en alls tóku 8 rannsóknamenn frá Hafrannsóknastofnuninni þátt í leiðangrinum. Skipstjóri var Ásmundur Sveinsson.
